ફોનની રિંગ વાગી. ડિસ્પ્લે પર જોયું. સહેજ વાર જોઈ રહ્યો. એનો ફોન હતો. ત્રણ-ચાર મહિના પછી. વિચાર આવ્યો કે આનું ઠંડું યુદ્ધ ખતમ થઇ ગયું કે સીધો હુમલો કરવા ફોન કર્યો હશે? વધારે વિચાર્યું નહિ, એનો અચાનક મૂડ બદલાય અને એ અડધી રિંગે જ ફોન કાપી નાખે એ પહેલાં ઉઠાવી લીધો. જે હશે એ જોયું જશે.
*** ***
"હલો..."
"ઓયે... સાંભળ. એક મસ્ત વાત કહું."
"બોલ ને."
"પણ પહેલાં પ્રોમિસ કર કે તું હસીશ નહિ મારા પર."
"હા બાબા. નહિ હસું. બોલ તું."
"મને રસોઈ કરતાં આવડી ગયું."
"હાહાહાહા..."
"જો. નાલાયક તેં પ્રોમિસ કરેલું કે તું નહિ હસે."
"અરે પણ તું વાત જ એવી કરે તો હસવું આવી જ જાય ને!"
"હુંહ. આખા ઘરનું જમવાનું રોજ હું જ બનાવું છું. ને બધાં ખાય પણ છે. વખાણી-વખાણીને. મમ્મી તો રોજ કહે કે તું તો મારા કરતાં ય સરસ જમવાનું બનાવે છે. "
"મારા ઘરે પણ રોજ હું જ પોતું મારુ છું, બોલ."
"જા ને, જુઠ્ઠો! એક નંબરનો જુઠ્ઠો. તું પાણી પીને ગ્લાસ પણ જાતે હેઠો મૂકે એવો નથી. આવ્યો મોટું પોતું કરવાવાળો!"
"અરે સાચે. હું જ પોતું કરું છું. અને બહુ જ સરસ પોતું કરું છું. પૂછી જો ઘરે કોઈપણને."
" વ્હોટેવર. એ જવા દે. કાલે કેવું થયું ખબર છે, મેં પહેલી વાર દાલફ્રાય જીરા-રાઈસ બનાવ્યા. પપ્પાએ તો એટલા બધાં વખાણ કર્યાં ને. મમ્મીએ પણ કહ્યું કે બહુ જ સરસ બનાવ્યા છે. તો હું ખુશ ખુશ. પછી હું જમવા બેઠી. થૂઉઉઉઉ. સાવ જ થર્ડ-ક્લાસ. સ્વાદનાં કોઈ ઠેકાણાં જ નહીં. હું જાતે જ ખાઈ ના શકી."
"હાહાહાહા."
"તું હસવાનું બંધ કર. ઘેર આવીને ઝૂડી નાખીશ. હા તો, પછી મને બહુ ખોટું લાગ્યું. હું જેવું બનાવું એવું એ લોકો ચૂપચાપ ખાઈ લે. એવું થોડી ચાલે? મેં કીધું મમ્મીને. તો મમ્મી કહે કે 'ખરાબ બનાવ્યું છે એમ કહીએ તો તું કાલથી બનાવવાનું જ બંધ કરી દે. વળી બનાવ્યું એ નથી દેખાતું, 'ને વાંધા-વચકા શેના કાઢો છો એમ કહીને ભડકીને તપેલું ય ઊંચું કરીને પછાડે તો ? એના કરતાં જેવું હોય એવું ખાઈ લેવું સારું.' બોલ, આવું કરે એ લોકો મારી જોડે.
"હાહાહા.. પણ તું સાચે એવું કરે એવી છે. એટલે બિચારા ડરે જ ને."
"જા ને. તું દર વખતે મારા સિવાય બીજા બધાની જ સાઈડ લીધા કર. મેં શું કામ ફોન કર્યો તને? હુંહ. ચલ ફોન મૂક. વાત જ નથી કરવી તારી જોડે. બાય."
*** ***
ફોન કટ. ફરી બુઝાઈ ગયેલી ડિસ્પ્લે સામે જોયું . ચહેરા પર આછી-સી સ્માઈલ હતી. વિચારતો હતો કે કેવી લાગતી હશે એ રસોઈ કરતી વખતે! કેવી ધમાધમ થતી હશે રસોડામાં! ગ્લાસ-થાળી-ચમચા જે હાથમાં આવે એ પછાડતી હતી એ જ છોકરી હવે એ બધું જ સાચવી-સાચવીને મૂકતી હશે. રોટલી બનાવતી વખતે એની પેલી લટ આંખો આગળ આવી જતી હશે, 'ને એ ધીરેક રહીને....
"વૈભવ...."
"હા, મમ્મી..."
"બેટા, પોતું મારી દે ને. તું તો મારા કરતાં ય સારું પોતું મારે છે..."
'ને અચાનક મને ટ્યુબલાઇટ થઇ. એની મમ્મી ય એને એવું કહેતી હતી કે એ એમના કરતાં ય સરસ જમવાનું બનાવે છે, જેથી એ રસોઈ કરવાનું બંધ ના કરી દે.
થોડી વાર જોઈ રહ્યો મમ્મી સામે. પછી હસતાં-હસતાં એટલું જ પૂછ્યું :
" મમ્મી... સાચે?"
" મમ્મી... સાચે?"
#તારી_મારી_વાતો heart emoticon
No comments:
Post a Comment