2015ના પાઠ...શીખો તો ય..સમજો તો ય !

Lessons from 2015

આમ તો નાનો હતો ત્યારથી જ ઘટનાઓથી ભરપૂર અને કાંડ-પ્રચૂર જીવન જીવ્યો હોવાથી કહેવા જેવું તો મારી જોડે બહુ બધું હોય છે. પણ આજે ફક્ત 2015માં હું જાતે અથડાઇ-કૂટાઈને શું શીખ્યો એટલી જ વાતોથી તમારું માથું ખાઈશ.

1. જીવન અણધાર્યું છે. તમે તમારા પ્લાન્સ બનાવ્યા હશે, તો જિંદગીએ પણ એના અલગ પ્લાન્સ બનાવ્યા હશે. ને તમે દર વખતે એ જ માથું ખંજવાળતા રહી જશો કે આના પ્લાન દર વખતે મારા પ્લાનથી ઉંધા જ કેમ હોય છે ? એટલે હે પાર્થ, હંમેશા તૈયાર રહે. બધુ જ ટકાટક ચાલતું હોય ને અચાનક એકે-એક વસ્તુ તમારી વિરુદ્ધમાં જવા લાગે ને તમે એમ વિચારતા રહી જશો કે "સાલું આ વખતે કોણ મંતરી ગયું !" આવું થવાનું જ. સરપ્રાઈઝની આદત પાડી દો.

2. તમે હંમેશા દરેકનું સારું નહીં જ કરી શકો. જો તમે કૈંક કરો છો, તો ક્યારેક ને ક્યારેક, કોઈકને કોઇકનું તો કૈંક બગાડવાના જ. " હું તો ક્યારેય કોઈને હર્ટ ના જ કરું " એવાં ફાંકા રાખવા હોય તો શાંતિથી ઘરમાં જ ગોદડી ઓઢીને સૂઈ રહેવું. અરે તમે કઈ જ નહીં કરતાં હો ત્યારે ય મફતમાં હર્ટ થતાં રહેનારા મળી જશે તમને. એટલે ઈરાદાપૂર્વક કોઈને દૂભવીશ નહીં એવું રાખવાનું, પણ અજાણતા કોઈનું કૈંક બગડી જાય તો માફી માગી લેવી, ને ફરી આ ભૂલ નહીં કરું એવાં નિશ્ચય સાથે આગળ વધી જવું. ખાલીખોટું ગિલ્ટનું પોટલું ગળે વળગાડીને ફરવું નહીં.

3. કોની વાતોથી તમારે ફર્ક પાડવો છે ને કોના તમારા વિશેના મંતવ્યોનો ડૂચો વાળીને કચરા-ટોપલીમાં ફેંકી દેવો છે એ વિષે બિલકુલ સ્પષ્ટ રહેવું. કોઈ પણ આવીને તમારા વિષે ગમે તે બોલી જાય એટલે સીધું આત્મ-ચિંતન કરવા બેસી નહીં જવાનું. "એ ડફોળને મારી જિંદગી વિષે ખબર નથી તો એની વાત તેલ પીવા સાંભળું ?" એટલું જાતને પૂછી લેવું. કોઈક આવીને આપણને જરાક ઠોંસો મારી જાય એટલે રસ્તો બદલી ના નાખવો. આ આપણી જિંદગી છે, પાવર-સ્ટિયરિંગવાળી ગાડી નથી તે ગમે ત્યાં વાળી દેવાય. Do not let anyone else drive your life.

4. ભૂલો કરવી. કરતાં રહેવી. પણ એકવાર ખબર પડી ગઈ ક સાલું આ તો ભૂલ થઈ ગઈ છે એટલે તરત જ ત્યાં જ અટકી જવું. એ ભૂલ પર ઘૂંટ-ઘૂંટ ના કરવું. અને ભૂલ થઈ ગઈ છે એવું સ્વીકારવાની હિંમત રાખવી. " હવે કશું ના થાય, હું ભૂલ સ્વીકારીશ તો તો આભ તૂટી પડશે, આ બગડશે, પેલાની નજરોમાંથી ઉતરી જઈશ, લોકો મારી કેવી વાતો કરશે " આવું બધું બે જ મિનિટ માટે વિચારવાનું બંધ કરીને ગાંડાની જેમ હિંમત જૂટાવીને એકવાર ભૂલ થઈ ગઈ એવું સ્વીકારી લેવું. કદાચ આમાંથી કશું જ ના થાય, કદાચ આનાથી ખરાબ પણ થાય. પણ કોઈ તમારી સામે ય નહીં જોતું હોય ત્યારે ય તમે એટ-લિસ્ટ અરિસામાં જોઈને ખુદની નજરોમાં તો નજર મિલાવી જ શકશો. અને છેલ્લે, મહત્વનુ તો એ જ છે.

5. જ્યારે કોઈ વાતમાં કંફ્યૂઝ હો ત્યારે હા નહિ, ના પાડવી. " થઈ જશે, જોયું જશે, ફાવી જશે " એવું બિલકુલ ના વિચારવું. જેમાં તમે તમારું 100 % આપી શકો એમ ના હોય કે આપવા ના માગતા હોય એમાં ઇન્વોલ્વ થવું જ નહિ. નહિતર તમે ય ભરાઈ જશો ને બીજા કોઈને ય ખોટા ભેરવી દેશો. એક વખત કરેલું સમાધાન આખી જિંદગી બીજા હજારો સમાધાન કરાવશે. સમાધાન કરવાનું સ્વભાવમાં ના હોય તો એવી આદત પાડવી જ નહિ.

6. તળેટીના તળિયે ફેંકાઓ તો ય પાછા ઊભા થઈને હિમાલય ચડવાનું ઝૂઝારુપન રાખવું જ. હિંમત હારીને શસ્ત્રો હેઠાં ના મૂકી દેવા. ચાલે એટલું ચલાવી લેવું, ને ના ચાલે એવું હોય એમાં ખાઈ-ખપૂચીને લડી લેવું. કોઈ સાથ આપે તો પણ, ના આપે તો પણ.

7. પ્રેમ. થયો તો ઠાર. ના થયો તો ય ઠાર. કરો તો ઠાર. ના કરો તો ય ઠાર. આમાં મારુ-તમારું કે તમારી સોસાયટીવાળાનું કશું જ ચાલવાનું નથી. એટલે જે છે એ ચૂપચાપ સ્વીકારી લેવું. આપણા કે બીજાના પ્રેમ સામે મોરચો માંડવાની ભૂલ કરવી નહિ. ને એને અવગણવાની ભૂલ તો ભૂલમાં ય ના કરવી. તમારા બાપા તોપ હોય કે ના હોય, પ્રેમ સૌથી મોટી તોપ છે. ગમે ત્યારે ફૂટે, ગમે ત્યાં ફૂટે, ગમે તેની બાજુ ફૂટે. થઈ જ ગયો હોય, તો થવા જ દેવો. આમ પણ એના ફોર્સ સામે ટકી શકવાની મારી કે તમારી (કે સોસાયટીવાળાની) ઔકાત નથી.

8. જાતે જીવવું. સતત જીવવું. સખત જીવવું. Life is a hell of a ride. So, enjoy it. મુઠ્ઠીઓ ભીંસીને, બાંહો ફેલાવીને, રગ-રગ ફૂલાવીને.

બસ તો.. હવે અહી શું કરો છો ? 31st ની પાર્ટીનો થાક નથી લાગ્યો ? શું કીધું ? આજે ફરી પાર્ટી ? જબરા છો તમે તો યાર !

અલવિદા 2015. આભાર. જે બધું તેં આપ્યું, ને જે બધું તેં લઈ લીધું એ દરેક માટે. સ્વાગત 2016. તું આવી જ ગયું છે તો હવે શાંતિથી બેસજે, ભાગ-ભાગ ના કરીશ. વાતો કરીએ થોડીક સુખ-દુઃખની ! grin emoticon